Mit een Mol hett dat „Klick“ maakt

Gottes Wort erklingt in vielen Sprachen, auch im Bereich der Bleckmarer Missionsarbeit. Um das anschaulichzu machen, gibt es „Beim Wort genommen“ seit Nr. 3/15 jeweils in zwei Sprachen: auf Deutsch hier im Blatt und in einer anderen Sprache im Internet. Diesmal ist die Internet-Sprache Plattdeutsch – die Muttersprache vieler Missionare aus der Lüneburger Heide, und die Muttersprache eines sehr bekannten Hermannsburgers…

Mit een Mol hett dat „Klick“ maakt
Bi een Bibelwoort hett dat „Klick“ maakt. – Nee, nich bi mi, sünnern Paster Louis Harms ut Harmsborg, den „Karkenvadder vun de Buern in’ne Lümborger Hei’”. An’n 14. November 1865 is he störven. Dat is nu 150 Johr her.
Keen weer Louis Harms? To Welt kaamen weer he 1808 in Walsro’e; upwussen is he in Harmsborg. In Celle hett he Abitur maakt un dornah in Göttingen Theologie studeert. He woll Paster warrn – liek as sien Vadder.
Louis Harms weer ‘n flietigen Student, hoochintellegent un mit een phänomenol good’t Gedächnis. De Saaken föllen em man bloots so to. Al nah dree Johrn weer he mit’t Studium fardig. Man sien Glooben weer em meist ganz afhannen kaamen. Siene Vernunft keem mit de Bibel nich kloor. Jesus weer för em bloots dat Vörbild för een tugendhaft un moraalisch anstännig Leven. He harr Twiefel. Ook in de Philosophie könn he keen Antwoort finnen.
Am Enn hett Louis Harms sik doch wedder de Bibel vörnommen. He füng an, se upmerksom to lesen. Un dorbi is dat denn passeert. In’t Johannesevangelium lees he, woans Jesus Gott, sien himmlischen Vadder, dorüm bidd, dat de Minschen dat ewige Leven kriegt: „Vadder, giff, dat se di erkennen doot, dat du alleen de wohre Gott büst, un ook mi, den du schickt hest, Jesus Christus; denn hebbt se dat ewige Leben“ (Johannes 17,3).
Bi düssen Bibelvers hett dat „Klick“ maakt. Dütt Bibelwoort hett Louis Harms de Oogen aapen maakt. Mit een Mol seeg he: Jesus is nich bloots dat Vörbild för Tugend un Morol, dat jichens mol vör 1800 Johrn leevt hett. Nee, Jesus leevt jümmer noch. He is ganz nöög bi mi. He is mien Herr un mien Erlööser. Bi em tellt nich, dat ik siene Wohrheit bloots mit mien Verstand begriepen do. Ik schall an em glööven; un dat heet, dat ik Christus in mien Hart upnehm, dat ik em vertroo un em leev heff.
Dat weer de Wennepunkt in sien Leven. Doröver hett Louis Harms laater mol uurdeelt: „Eens heff ik Jesus mit mien eegen Vernunft un Weisheit socht; ober dormit könn ik em nich finnen. Denn ober heff ik Jesus in’ne Bibel socht un in’t Gebeed, un dor heff ik em funnen dörch de Gnaad un de Kraft vun den Hilligen Geist.“
(schreben för NDR Radio Nedersassen, to höörn an´n 16. November 2015, Klock 14.20)